dimanche 27 mai 2012

UNELFE, taiñ inatugekey ruf rúpüntukugeam dungu


Rumelmogelerpuay ta chuntenmale rüf iñchiñ ta iñ kuyfike kimün, inaduamnierpuliyñ ta mapuche rakiduam küme wechuay ta weychan. Feychi ñimitukimün petu ta neweñmamefiyñ ta fantepu mew pu chachay, pu papay, pu fochüm, pu malen. Newenpüllüleayñ ta komñentu, iñ eluwmelayal ta kake weyake rakiduam ta inayefilu chi pu che kim güneduamnulu...
UNELFE,  taiñ inatugekey ruf rúpüntukugeam dungu
Ad wirin mew, wente pule: Mapuche Unelfe KALLFV WENU.

Pu Lof Trawün mew.

Rvf kuyfi mapuche rakiduam mew, uneltu adkintugekefuy ta wenu. Chew ñi rupan ta nampülkafe, pu ke weychafe kam küdaufe kuyfikeche adkünüwkefuy meli wixan mapu mew UNELFE (wünelfe) mew. Ella pun, epe wün püle pelontukeniekefuy ta mapu, pelontukuniekefuy ta ñi pu mapunche, ñi ñamnuael, ñiwinuam, ñi küme puwam chew ñi amuael, puel, willi, lafken kam pikun mapu (Meli Wixan Mapu) püle. Ragi kallfü wenu mew ta wefpalu, kallfüwenu fücha, kallfüwenu kude, kallfüwenu weche, kallfüwenu üllcha egün ta múlenmew ta tüfey.

Rupachi xipantu mew, akunmew ta pu ke wigküfe (wigka) epe ñamtufuy ta feychi rüf mapunche kimün, rüf mapunche rakiduam. Pu chilenu wigka nüñmapaelumu ta iñ mapu zoy zoy ta ñamnagi ta feychi kimün, pünonagnieñetufuy ta tüfey.

Weychafilu ta pu kigka iñ pu kuyfikecheym, wirintukufigün ta feychi ad, wenultunierpuafiel ta füxake malon mew, marikechiwewün mew afkentu.

Fantepu mew welu, wigkawtulu ta iñ kiñekentu pu politikokeche weyakona, weyalkameketuygün ta ka ke kimün mew. Wixampürammeketuygün ta ragi ‘folklor’ mew xipa chi UNELFE reke mülekefel… wenufoye pitufigün ta fewla. ¿Kom wallontu meli wixan mapu mew re foye mew müten am ta gillatumekeykey ta iñ pu che? Ka müley ta pewen, xiwe, külon, rügi, küla … ka femgechi ta pu wigküfe ñi wagülen wirintukukünugey ta rañi kawiñkura mew, ¿Rüf mapuche güneduam am ta tüfey, kam indeginismo rakiduam unentukuley feychi kimün mew? Ka femñechi ta ragi pu wigküfe (weya ke wigka) gobierno ñi ruka mew ta pewfaluwkey, nüxamkameken mew ta pu yanake kona egün. Ragi pulof mew welu petu konlay, kakerumeke che doy ta inatukantumekefi.

UNELFE (wünelfe) may ta inatugekey küme rúpüntukugeam dugu, adkünugeam ta kiñerume rakiduam, kiñe rume gülam, kiñe rume weychan, kiñi rume füf mapuche feyentun. Ta iñ ñamnuael, ta iñ ñiwinuam chew püle rume xekakonle iñ pu weychafe, ñi unentulerpuael ta feychi küme ad, feychi küme pelon, feychi küme feyentun. Kilapang 8Külapagi)Toki ñi wixampüramel, Mañil Wenu ñi wixampüramel, Mariluan ñi rixampüramel. Rüf weychafeke toki ta ñi wixampüramel.

Rumelmogelerpuay ta chuntenmale rüf iñchiñ ta iñ kuyfike kimün, inaduamnierpuliyñ ta mapuche rakiduam küme wechuay ta weychan. Feychi ñimitukimün petu ta neweñmamefiyñ ta fantepu mew pu chachay, pu papay, pu fochüm, pu malen. Newenpüllüleayñ ta komñentu, iñ eluwmelayal ta kake weyake rakiduam ta inayefilu chi pu che kim güneduamnulu, kim rakiduamnulu kidu iñchiñ ta iñ mari fúxa kuyfi kewün mew.

Fütalmapu Kiñewtun Xawün Mapu. Marichiwew!!!!!

Aucun commentaire: